【遊戲介紹】五打五射擊對戰 《Veiled Expert》有跑酷及場景破壞元素封測展開

又有一款具潛力嘅五打五 FPS 新作《Veiled Expert》推出，除咗基本射擊玩法外更加入更多如跑酷、施放技能、場景破壞等元素，齋睇片都覺得正！黎緊將會進行封閉測試，現時已可於商店頁面申請資格，衝得過！

《Veiled Expert》由韓國 Nexon 旗下 Nexon Games 開發，係一款多人線上對戰射擊遊戲，使用第三身視點。玩傢將分成兩隊對戰，玩法係去目標地點引爆或解除炸彈，有九名各有特性及技能角色選擇。例如「Soy」就擁有恢復附近隊友力量、護甲、補充彈藥等技能，「Nicki」 可多次自行復活、「Simon」可以擊殺敵人後可偷取對方資源等等。另外，部份角色會有自己專屬初始武器，玩傢可根據角色各種特性選角，不同隊伍組成都會產生唔同策略，有別於其他 FPS 遊戲。

遊戲除咗基本對戰射射射之外，加入 Parkour 跑酷元素，玩傢可以爬上高處，喺樓與樓之間跳躍，使用飛索移動等等，令戰鬥範圍大增，節奏更快。同時遊戲加入「動態變化」系統，簡單講就係會 Keep 住環境變化，有時會出現沙塵暴，有時會起霧。場景上亦設置大量爆炸物，牆壁、建築物、橋樑都可被摧毀，即係無得死 Camp 喺一個位，逼你不停移動，玩起上黎就更爽。

《VEILED EXPERTS》由即日起開始進行 Beta 測試申請，隻要到 Steam 頁面即可，成功者可參與 6 月 9 日 – 26 日嘅測試。