【遊戲介紹】基地防禦模擬遊戲 《Autonauts vs Piratebots》編程機械人進行各種工作極上癮

幾年前曾經推出一款有趣嘅遊戲《Autonauts》，主要玩法係透過幫機械人設定自動化程序，設定佢哋去做唔同嘅工作，成為全自動化農場。呢款作品不但係 Steam 有「極度好評」評價，Metacritic 都有 80 分，非常唔錯。新一集《Autonauts vs Piratebots》日前正式發表，由上一集玩建設變成防衛，今年夏季出。

《Autonauts vs Piratebots》由 Denki 開發，係一款模擬策略管理遊戲。上一集玩傢玩嘅係設定機械人自動化程序，喺未開發嘅星球上自動進行採集資源、建設、耕作等工作，建造居住地。今集就因為有其他自動化海盜兵團覬覦此地，所以就變為設定機械人進行自動化防禦，以自動化對抗自動化。

要建立自動防禦機械人軍團，首要自然係要訓練及編程各類型嘅機械人（就算完全唔識寫程式都無問題，但係識少少就會更易上手），現時已知有戰士、弓箭手、騎士等類型。擊敗敵方後，有機會獲得新嘅技術，以此去解鎖新職業及建造設施。防禦外敵同時，都係要透過設定自動農業機械人去耕種，賺除金錢及自然資源後製造新嘅工具及機器。至於戰鬥部份現時並未公開玩法細節，隻知道會係 RTS 風格，要喺武裝軍團同時建造堅固城牆及武裝砲塔。

根據上集嘅經驗，開頭要不斷摸索點設定機械人程序，慢慢進化到用機械人去設定機械人，呢個研究嘅過程會令人玩得非常投入，極度上癮，有興趣嘅朋友要留意。《Autonauts vs Piratebots》預計於 2022 年推出，對應平臺為 PC Steam。