【遊戲介紹】音樂節奏射擊動作 《Metal: Hellsinger》配合重金屬音樂節奏射擊砍殺

喺 2020 年發表嘅《Metal: Hellsinger》係一款非常有趣嘅作品，因為佢主要嘅玩法係要跟返音樂節奏作出攻擊，比起正常射擊動作遊戲要顧嘅野更多。早前就正式公佈推出時間，並且即日起推出免費體驗版下載。

《Metal: Hellsinger》由 The Outsiders 開發，係一款結合重金屬音樂節奏與射擊動作嘅遊戲，採用第一身視點。玩傢將扮演半人半惡魔嘅主角，為咗復仇闖進地獄大開殺戒，誓要殺盡八座地獄打倒惡魔大軍及魔王，將恐懼烙印於佢哋心中。

本作最獨特之處係要跟返音樂節奏去玩。畫面中間嘅準星兩側會不停有箭咀向中間移動，睇準時機攻擊就會有約超大加乘，當然使用不同武器按鍵嘅節奏都會唔同。舉例用雙槍係可以每個拍子都開一次槍，但係用霰彈槍時因為連射率低，變咗要跳拍子撳，玩傢要喺切換武器時適應該武器節奏。當然你會問「跟唔到節奏咁點算」，其實一樣有傷害，但係跟節奏嘅傷害會係原本嘅 6 – 7 倍，仲會累積 Combo 儲力，儲夠有得出超必，所以都係盡量跟返節奏去玩先夠爽。

由於本作主打「音樂」，所以喺每關開始前左上角都會標明歌曲名字。另外，為咗令大傢更方便做直播做片分享，製作團隊已表明所有音樂不受 DMCA 約束（Digital Millennium Copyright Act，DMCA，美國著作權法），好正。

《Metal: Hellsinger》預計於 9 月 15 日推出，對應平臺為 Xbox Series X|S、Xbox One、PS5、PS4 及 PC Steam，現時於 Steam 可下載免費體驗版。